जीव समझोतरी 1-30

ओं ओतार अपार अजोनी - जाकै लार तिस्या रिख मोनी
धरती आभ रच्या दोय भांडा-जामण मरण रच्या दोय डांडा ।।1।।
सिसर भाण रच्या पोन पाणी-खाणी च्यार रची चित्र वाणी
दस दिगपाळ रच्या खट जती-दस ओतार सगत सात सती ।।2।।
नाथ रच्या नव सिद्ध चौरासी-ओपत आथ करै अवनाशी
सर नेतीसर चवदै इन्द्र-साति दीप कै'सात समंद्र ।।3।।
ब्रह्मा वेद रच्या परमारथ-दाणू दैत रच्या अंत भारथ
पाप धरम रच्या दोय भेळा-तीरथ धाम रच्या जुग मेळा ।।4।।
रच्या रिध सिध ग्रह नौ थावर-रच्या एक पुज्य रच्या मंजावर
रच्या सुख दुख ग्रह नौ थावर
रच्या रिख मोनी रच्या सिध जोगी-रच्या अहंकार रच्या अंत भोगी ।।5।।
जोगण वीर रच्या जम कंकर-रची नौनिध सोलै सिध संकर
माया ब्रह्म नितोपत सागै-लालू मुक्त हुवै भ्रम भागै ।।6।।
कोरम कछमछ ओतस्या, नरसिंघ नै परसा
तेता जुग में रामचंद, क्रिसन कळा सरसा ।।7।।
व्यास धनंतर वेद कपल मुनि, बळराजा बावन
बुध निकळंकी दत्तात्रय स्वामी, आया बाळ मुकन ।।8।।
ओतारां री आरज्या, पढ्यां गुण्यां यै पळ
पाचूं तत्त परसण करै, राखै ब्रह्म सजळ ।।9।।
ध्यानी नी सिव सारसा, ज्ञानी सा गोरख
रै ममै सूं निसतिस्या, कोड़ अठासी रिख ।।10।।
अलख अमोलख नांव है, मन करलीज्यो स्याही
दिन दस पीछे नीसस्यां, वापरसी मुंगाई ।।11।।
'लालू' हंसळू तो मोती चुगै, बुगला गार तळाई
हरिजन हरि मैं यूं मिल्या, ज्यूं जळ मे रस भाई ।।12।।
जरा मरण अर जलम पुनि, यां जुग दुख घणाई
चरण सरेवां राज रा, राख लेवो सरणाई ।।13।।
गगन मंडळ बिच परम सुन, जहां हीरां री खान
विरला पों'चै पारखू, सिल सांसै री भान ।।14।।
क्यूं पकड़ो हो डाळियां, नै'चै पकड़ो पेड़
गऊवां सेती निसतिरो, क्या तारेगी भेड ।।15।।
साधां में अधवेसरा, ज्यूं घासां में लांप
जळ बिन जोहडै क्यूं बड़ो, पगां विलूम्बै कांप ।।16।।
साध बडा संसार में, ज्ञान दे गाफल तारै
दीसड़ता जुग मांय, रहत कर जुग सूं बारै ।।17।।
'लालू' हिरदै हर परकाश, ऊजळ ब्रह्म विचारै
पापी हैं पुन बिन खीण, जीव दरगा दुरकारै ।।18।।
नाळ पाळ अर बहत्तर कोठा, सुरंगी चाढ घड़ाई
उन मुन रह अमी रस पीवै, विरला जोगी कोई ।।19।।
जोग धरेधर नीसस्या, पायो नी बीजक
लालच सूं लपट्या रहै, करै भवानी भख ।।20।।
पारवती प्यारी सती, काळी सो हिंगळाद
जोगी झीणा पौंन सूं, पाणी सूं पतळाद ।।21।।
हुळका झीणां पातळा, जमीं सूं चौड़ा
जोगी ऊंचा आभ सूं, राई सूं ल्होड़ा ।।22।।
हक हुलकारूं माल, साच री साबत कुंडी
पीवो भांग प्रीत, पांच तत पूरी झंडी ।।23।।
होफां ल्यो हरि नांव री, अमीं अमल रा दौर
साफी कस्य गुरु ज्ञान री, पीवो ज आढू प्हौर ।।24।।
प्रेम कटारी तन बहै, ज्ञान सेल रा घाव
सुनमुख जूझै सूरवां, से लोपै दरियाव ।।25।।
परमारथ पासै रहै, खांच लेवै सिर भंड
नेकट दीजै नारगी, से कीड़ां री कूड ।।26।।
लालू कर सूं तो बाटै नहीं, बीजां सेती आड
से नर जासी नारगी, चौरासी री खाड ।।27।।
माथा लग जां मौन रै, चित चौड़े चौगान
जीतें जोगी जातवंत, हारै से हैरान ।।28।।
हारै से हांसल भरै, खोसै जुग रंडी
दाम न देवै देह रा, जोगी वनखंडी ।।29।।
काया में कैलास, न्हाय नर हर री पैड़ी
बह जमना भरपूर, नितोपत गंगा नैड़ी ।।30।।