सिंभूधड़ो - भाग 3

ओं विष्णु ध्यायां आव बधे, गोरख ध्यायां रिठ्या ।1।
ईसर ध्यायां मोख मुगत, चांद सूरज दोय साखी ।2।
ईसर बाबै ओ जुग सिरज्यो, सिरज्यो सब संसारूं ।3।
चवदा भुवन घड्या इक घाई, पेला पार अपंपर पारूं ।4।
इक लख भांज सवा लख घड़सी, जीया जूण सवारूं ।5।
काया कोठी जीव ज गढवो, मनस्या मुदै मुदारूं ।6।
सील नगरी में गोरखजी बैठा, विष्ना धंधुकारूं ।7।
सीले संजमे ईसरजीने, गोरखजी भेट्या, भळकतै दीदारूं ।8।
जे नर से नर धरम ज्हां पलै, करणी चाली सारूं ।9।
ईसर जन्मे ले ले कर्मे जागै, फेर लेवै ओतारूं ।10।
ईसर देवांदेव सिधां में साधक, जुग जुग रो ओतारूं ।11।
ईसर जाटे जटवो राजे रजवो, बाणी. बिणजारूं ।12।
ईसर सारां हुंता खोखर करल्यै, खोखर करल्यै सारूं ।13।
ठाला छलै भस्या रितावै, करय अखुट भंडारूं ।14।
ईसर लाहे लाह्य खुदाये खदवो, आपो है निरकारूं ।15।
ईसर पीरे पीर दरगाये, दरवेस, नित छाजै निसवारूं ।16।
संन्यासिये संन्यासी, सरेवड़े, सरेवड़ो, आपो है जटधारूं ।17।
ईसर मीठा मेवा औरां सोपे, आप चरै विष खारूं ।18।
ईसर खोटे खोटो असले मोटो, कूड़ां साथ खवारूं ।19।
ईसर आप ही गाजै आप गडूकै, आप ही वरसणहारूं ।20।
ईसर आप ही जम आपही जरवाणों, आपही जैवर जिनारूं ।21।
ईसर आकास पिंयाळे चक चौफेरी, धुंधलियो धंधुकारूं ।22।
चांद सूरज दो नैण ईसर रै, सीसज भळकै तारूं ।23।
ईसर दिने दिन मुहुरते मुहुरत, वार सजै नितवारूं ।24।
ईसर उत्तरे उत्तर दिकणे दिखण, पूरवे पूरव पिछम है निरकारूं ।25।
वण तिण त्रिभण नूर ईसर रो, वणी अठारा भारूं ।26।
अठकुल परवत नूर ईसर रो, सायर सात पखारूं (परवत मेर सुमेरूं)।27।
सुरनर कोड़ा देई देवता कहिए, ईसर गोत परवारूं ।28।
सातूं सायर नूर ईसर रो, नौसै नदी झिलारूं ।29।
ईसर रै काई खेड़ न खड़बड़, तुरी न ताजी न घोड़ा उळठाणूं ।30।
धरती अर असमाण बिचाळे, भागां न ये जाणूं ।31।
पैलाणे गुरु दैत गडीस्यो, आपो है जटधारूं ।32।
उत्तमे उत्तम खमसी ईसर, मळ लेसी रजवारूं (मळवारूं) ।33।
कूड़े मन ना ध्याय ओ प्राणी, हुय ध्यावो हुसियारूं ।34।
जपो ईसर ध्यावो गोरख, आप उपावण हारूं ।35।
पांच पूर्व गुरु नांव कुहायो, जप रहियो निरकारूं ।36।
गुरु प्रसादे गोरख वचने जसनाथ निज जपियो सारां ही सारूं ।37।