सिंभूधड़ो - भाग 4

 

ओं पैलां सिंभू आप उपना, जप रैया निरकारूं।1।
जोग छत्तीसूं न्यारा रहिया, कुहाया एकैकारूं।2।
जोग छतीसां निरंजण साझ्या, किया है ओंकारूं ।3।
धरती माता नीवें रचाई, सीस रच्यो गैणारूं ।4।
जैरा पौन'र पाणी सिरज्या, चांद सूरज दीदारूं ।5।
ब्रह्मा विष्न महेसर हुआ, कियो वेद विचारूं ।6।
वेद कतेव ब्रह्मा साझ्या, किया ज्ञान पसारूं।7।
मंडळाई रो पड़दो लियो, रूप रच्या ओतारूं।8।
मछ कछ हुंता ईसर हुवा, आप उपावणहारूं।9।
ईसर सिरज्या देत'र देवता, जां कियो अहंकारू ।10।
देता टोटो देवां लाहो, कही न मानी कारूं ।11।
मछ क रूप संखासर छेद्यो, सागर किया खारू ।12।
कछ के रूप हुय झबरख मार्यो, कंटक खाधो काई ।13।
कुरम रूप कळंदर गाह्यो, मारयो पाघात सिंघारू ।14।
सतजुग आयो हिरणा ढायो, छळ मांड्यो छळकारूं ।15।
सिंहा मिहा सर्व पाले, पाल्या मुहुरत वारू ।16।
निनाणवे कोड़ गढ हाके ढाया, नरसिंघ री जैकारूं ।17।
सतजुग में हिरणाकस छेदयो, तीखी नैर पलारूं ।18।
सतजुग वरत्यो त्रेता आयो, त्रेता आयो बावन कुहायो
भिखे कियो भिथारूं ।19।
बावन रूप छळयो बळराजा, देखाळयो चटकारूं ।20।
दस डालम उण सुगड़ो छेक्यो, दोड्या कोहर वारूं ।21।
हिंसू अर पारधिया दाव्या, मांहे कीर कहारूं।22।
खुद खुदैया भीतर दाव्या ऊपर फेरी छारूं ।२३।
सुगड़ो अरज कर सायव नै, स्वामी सुणो पुकारूं।२४।
बो'ल़ा किरत किया उण राजा, नांव रैयो पण मोख न पायो
अगत्यो गयो गिवारूं ।25।
भागीरथ सिव संकर सेयो, ल्यायो गंग सुवारूं ।26।
जटा मुकुट सोवै जां हरने, वां कियो मुकुट जळ आप अपारूं।27।
भो मोचण हाली भू ऊपर, जद तद गंगा सोरम पारूं ।28।
भागीरथ कुळ सुरग सिधावे, दस डालम सिंभू जैकारूं ।29।
परसारूपी सैंसा अरजन छेद्यो, मार्यो खड़ग उभारूं ।30।
घर दसरथ रे जद ओतरियो, लाखे लखण कुंवारूं ।31।
लंका मार विभीषण थरप्यो, जद राघो जैकारूं ।32।
बाण संजोय दुसमणने बो'यो दहसिरदाणूने मार'र लायो छारूं ।33।
पैलाणे गुरु मुहुरत भेज्या, पाछै लाखण कुंवारूं ।34 ।
जपो ईसर ध्यावो गोरख, आप उपावणहारूं ।35।
त्रेता बरत्यो द्वापर आयो, द्वापर आयो का'न कुहायो
वासक रो असवारूं।36।
का'न कळा कंसासर छेद्यो नूरे लखण कुंवारूं ।37।
बुप रूपी पांचू पांडू सिरज्या, जांसूं ठाकुर हेत पियारूं ।38।
कोड़ अठारा कैरू छेदया, जां कियो अहंकारूं ।39।
द्वापर बरत्यो कळजुग आयो, कळजुग नर निकळंकी कुहायो
काळंग रिप किरतारूं ।40।
काळंग रो जी' सैनक जासी, छेदै संत उपकारूं ।41।
थोड़ा थोड़ा हसम घाले, नाचै धर गैणारूं ।42।
गणा मंडळ में तारा नाचे, वणी अठारा भारूं ।43।
लंक विलंका मेर मंदागिर, उदगर नाचै मेर तणा हथियारूं ।44।
रजिया खोजी हैद्र होजी बांचै है ओतारूं।45।
जाट कुळी में कांन भणीजै, क्रिसन कळा किरतारूं।46।
भागथळी ओतार लियो है, कुण लह अंतर पारूं ।47।
जुगा जुगां रा देवै निवेड़ा, अबच बचावणहारूं ।48।
खोजिया खोजी रेहु रहोजी, बांचै है ओतारूं ।49।
पांच सात नौ आगे तात्या कळजुग बारा तारूं ।50।
बारां रो माझी है निकळंकी, निकळंक री जैकारूं ।51।
गुरु प्रसादे गोरख वचने, (श्रीदेव) जसनाथ (जी)
बांचै निज सारां ही सारूं ।52।